David Movilla Real Unióneko entrenatzaileak agerraldia egin du gaur goizean Stadium Galeko prentsa aretoan, lehen taldeak igande honetan Bilbao Athleticen aurka jokatuko duen partidaren atarian.
“Gaur egun aurkariaren ezagutza oso zabala da talde guztiok ditugun tresnekin. Guk lan aurreratua dugu, maila ezagutzen dugulako eta Lezamako harrobia ezagutzen dugulako”, esan du Barakaldoko teknikariak kazetarien galderei erantzunez. Gaineratu duenez, “filialaren kontzeptuari beti batu behar zaizkio kalitatea eta lehen talderako jokalari potentzialak, hala nola eurek dituzten eta aurredenboraldia lehen taldearekin egin duten jokalari batzuk. Horietako batzuk laster ikusiko ditugu futbol profesionalean. Partida guztietan aurkariaren indarrak murrizten saiatu behar dugu, eta nahi duguna bultzatu. Gauza bera egiten saiatuko dira”.
Denboraldi honetan Bilbao Athletic taldeak bizi dituen arazoei buruz, sailkapenaren behealdean baitago, Movillak adierazi duenez, “Lehen Federazioa oso kategoria zorrotza da. Badakigu partida guztiek duten zailtasuna, baita Lezamakoa ere. Ondo egokitu beharko gara, Bartzelonan erasoko fasean egin genuena baino hobeto, eraso egin genuen baino hobeto, antzeko egitura batekin baina ñabardura desberdinekin”. Jokalari batzuek dituzten arazo fisikoen bilakaerari buruz galdetuta, Real Unióneko entrenatzaileak esan duenez, “absentziek baldintzatu egiten dute, baina ez dute mugatzen. Jokatzeko hamaika dauden bitartean… eta igandean jokatzeko hamaika egongo dira”.
Amaitzeko, azken partidetan erabilitako hiru zentral eta bi errailen defentsaz galdetuta, Movillak honakoa esan du: “Taldeak egitura aldatuko du, ez bakarrik partida bakoitzean, baita joko fase bakoitzean ere. Guk, azken bi partidetan, erasoko eta defentsako baliabide nagusia hiruko defentsa izan dugu, baina normalena, denboraldian zehar, lauko defentsa izatea da. Partidaren testuinguruaren araberakoa izango da”.
Lehen Federazioko 2. Multzoko 19. jardunaldiko partida igandean jokatuko da, Lezaman, 16:00etatik aurrera.
