Fran Justo Real Unióneko entrenatzailea Stadium Galeko prentsa aretoan agertu da gaur goizean, lehen taldeak igandean Osasuna Promesas taldearen aurka jokatuko duen partidaren atarian.
“Filial atipiko samarra da. Futbol konbinatiboa, erasoko futbola… ezaugarri nagusiak dituzten taldeetara ohituta gaude. Ez du esan nahi Osasuna Promesasek egiteko gai ez denik, baina taldea definitu beharko banu oso lehiakorra dela esango nuke, erasoko eta defentsako erritmo oso altukoa, erasoko trantsizioa bikain menderatzen duena, geldikako baloian oso indartsua, agertoki guztietan eta aurkari guztien aurka lehiatzeko gai dena, testuinguru guztietara egokituz”, adierazi du Irungo taldeko entrenatzaileak.
Justok aitortu duenez, “partida gogorra izango da, baina etxean jokatuko dugu, eta Real Uniónen bertsiorik onena ikusi behar dugu, taldeak batez ere etxean egiten duen joko hori aurkitu behar dugu, garaipenik lortu ez dugun azken partidetako dinamika hau eteteko garrantzitsua eta beharrezkoa izango litzatekeen garaipena lortzeko”.
Joan den asteburuan Leónen jokatu zen partidari buruz, Real Unióneko entrenatzaileak esan duenez, “ezin zara horrelako jokaleku batera atera horrelako aurkari baten aurka eta bigarren minutura markagailuan atzetik egon. Asko baldintzatzen zaitu. Hortik aurrera, taldeak gauza asko ondo egiten dituela uste dut, beste batzuetan gehiago doitu behar dugula, gure aukerak izan genituen… baina partidak aurrera egiten duenean eta gehiago azaltzen zarenean, badakizu galera edo trantsizio batean har zaitzaketela. Eta hala izan zen. Aztertu dugu, hitz egin dugu, baina burua eta energiak igandean eta Osasuna Promesasen daude”.
Lehen Federazioko 1. Multzoko 16. jardunaldiko partida igandean jokatuko da, Stadium Galen, 12:00etatik aurrera.
