Aitor Zulaika Real Unióneko entrenatzaileak agerraldia egin du gaur goizean Stadium Galeko prentsa aretoan, lehen taldeak larunbat honetan Stadium Galen UD Logroñés taldearen aurka jokatuko duen partidaren atarian.
Real Unióneko entrenatzailearen lehen hausnarketa sailkapenari eta azken partidei buruzkoa izan da. “Puntuei begiratzen diet. Zazpigarren postua ken diezazukete, bosgarrena zuk baten bati ken diezaiokezu… baina puntuak ez dizkizu inork kentzen, mugiezinak dira. Begira, azken hiru jardunaldietan partida atzeratuta eta bederatzi puntutik zazpi eginda, sailkapenean behera egin dugu, baina puntuak ez dira aldatzen”, adierazi du Zulaikak. “Fidatzen zarenari zaplasteko bat ematen dizute, ez, bi, eta berriro fidatzen bazara, beste bi. Argi eta garbi diot. Baina zerbait ondo egiten ari gara UD Logroñés aurkari zuzena bada. Iaz Bigarren Mailan zegoen, aurreko urteetan beti jokatu ditu igotzeko play-offak, aurten denboraldi bikaina egiten ari da. Taldea oso ondo landuta dago, gauzak oso argi dituzte, defentsarako eta erasorako argudioak dituzte… barietate handia dute”.
Azpeitiarrak ohartarazi duenez, “azken bost partidetan gol bat jaso dute. Egia da bai beraien emaitzak bai gureak laburrak izaten direla, eta gure artean jokatu ditugun partidek ere emaitza laburrak izan dituztela, gehienak haien aldekoak. Baina futbola hain da polita eta iragarrezina, non bihar emaitza handia izan baitaiteke. Lehenagoko sentsazioek esaten digute emaitza laburreko partida izan daitekeela”. Zulaikak adierazi duenez, “bost partida galdu ditugu etxean. Ez dugu ezkutatu behar, aurre egin behar diogu. Eta arrazoiei begiratu. Niretzat hainbat arrazoi daude. Hasteko, orain arte etxean izan dugun egutegia, teorian, zailagoa izan da. Bihar UD Logroñés taldearen bisitarekin uste dut lehen 10 taldeetatik 8 Galetik pasa direla. Jokoari dagokionez, agerian geratzen ari da, eta ez Real Unióni bakarrik, talde asko min handiagoa egiten ari direla trantsizioetan posizio-erasoan baino. Estrategian ere hobetu behar dugu. Hamaikatan jokatu ditugun hogeita bi partida ofizialetatik, gu jarri gara aurretik, eta horietatik hamarretan jokoan zeuden golengatik izan dira, estrategiagatik gol bakarra. Hamar aldiz jarri da aurkaria aurretik. Horrek esan nahi du hemendik aurrera bost galdutatik bost irabaziko ditugula, nahiago nuke, edo etxetik kanpo zortzi irabazi beharrean zortzi galduko ditugula, nahiago nuke ezetz. Futbola da, asmatzeko oso zaila”.
Partidaren inguruko jarduerak
Klubak partidaren atarian antolatutako jarduerei buruz, Zulaikak adierazi du “klubak mila historia egin” ditzakeela. “Bihar batzuk egingo ditu. Oso eskertuta gaude. Eskerrik asko, baina gu gara zaletuak piztu behar ditugunak, gu gara protagonista nagusiak. Gure lana da. Hortik aurrera, klubean, Irunen eta inguruetan egiten den guztia ongi etorria izan dadila”.
Real Unióneko teknikariak adierazi duenez, “aspaldi esan nion presidenteari azken hilabeteetan klubeko hainbat egun izan ditugula, ez taldekoak, klubekoak. Gogoan dut San Inazio eguna, eskolarako 150 neska-mutil etorri ziren eguna, Deportivoren eguna… horiek klubeko egunak dira, oso garrantzitsuak dira kluba hazteko, eta hori da denok bilatzen ari garena”.
Ander Bardajíren fitxaketa
Kazetariek atzo iragarritako Ander Bardajiren fitxaketaz ere galdetu diote. “Entrenatzen ezagutu dut hemen, eta ondo irabazi du. Ez dakit Bardajíren fitxaketari buruzko argudioak emateko pertsona egokia naizen. Baina niretzat argudioak argiak dira, berarekin hobeak gara”. Zulaikak adierazi duenez, “Iza oso zorte txarreko urtea izaten ari da. Lehen taldeko atezain bati zerbait gertatzekotan, etxeko bosgarren edo seigarren atezainari tira egin behar genion Riazorrera joateko. Bardajíren aukera gustukoa genuen etxean izanda eta hau aukeratu dugu plantilla indartzeko”.
Lehen multzoko 23. jardunaldiko partida larunbat honetan jokatuko da, Stadium Galen, 19:00etatik aurrera.
