Iñigo Idiakez Real Unióneko entrenatzaileak agerraldia egin du gaur eguerdian Stadium Galeko prentsa aretoan, taldeak igande honetan Real Bren aurka jokatuko duen partidaren atarian.
Teknikariak adierazi duenez, “Real B ez dago bere momenturik onenean, baina futbolean oso ondo jokatzen jarraitzen du. Haien helburua pixka bat desberdina da, lehen talderako jokalariak ateratzea da”.
“Hau boladaka doa, baina ez nago kezkatuta golik sartzen ez dugulako. Kezkatuta nengoke aukerarik sortuko ez bagenu, jendea motibatuta egongo ez balitz, aldagela hondatuta ikusiko bagenu. Baina guztiz kontrakoa da, jendea oso ondo ari da entrenatzen, gogotsu dago. Realaren aurkako partida berezia da. Ea azken partidetan sortzen ari garen aukerak sortzen jarraitzen dugun, baina gauzatzen ditugun”, adierazi du Idiakezek kazetarien galderei erantzunez.
Real Unióneko teknikariak “ondo” ikusten du Real B, “jokoaren ideia argi batekin. Oso jende gaztea da, goian aukera bat noiz emango zain dagoena. Gainera, Imanolek, merezi baduzu, aukera ematen dizula jakinda”.
“Gure jendea behar dugu. Gustatuko litzaidake zelaia beteta egotea, mundu guztia etortzea, gure alde egitea. Hitz ematen dizuet taldeak lan egingo duela eta gauzak ondo egiten saiatuko dela, poztasun bat emateko”, amaitu du.
Lehen Federazioko 1. Multzoko 28. jardunaldiko partida igande honetan jokatuko da, Stadium Galen, 16:00etatik aurrera.
