Real Unióneko entrenatzailea gaur goizean agertu da Stadium Galeko prentsa aretoan, SD Logroñés taldearen aurkako partidaren atarikoan
Aitor Zulaika Real Unióneko entrenatzaileak agerraldia egin du gaur goizean Stadium Galeko prentsa aretoan, lehen taldeak igande honetan Las Gaunasen SD Logroñés taldearen aurka jokatuko duen partidaren atarian.
“Baliteke kategoriako errebelazioa izatea armarria edo kluba ikusita, baina bere jokoa aztertzen baduzu, ez da errebelazio bat. Nire ustez, gaur egun, gure multzoan futbolean ondoen jokatzen duen taldea da. Oso sasoi onean dagoen taldea da”, adierazi du Real Unióneko entrenatzaileak. Entrenatzaile bisitaria ere aipatu nahi izan du. “Askotan nabarmentzen ditugu Cristiano edo Messi, baina nik César Caneda bezalako norbait nabarmendu nahiko nuke. Nire kintako gizon bat, taldeak jokatzen duen bezala jokatzea eragiten ari dena. Ez dut asko ezagutzen, baina ispilu bat da non begiratu. Plazer bat da haiek jolasten ikustea”.
Logroñotik hiru puntuekin itzultzeko gakoez galdetuta, Zulaikak esan du “ez garela erotuko haiek nola dauden ikusita. Gu ere ondo gaude. Antzeko ideiak dituzten bi talde ikusiko ditugu, baina ñabardura desberdinekin. Irabazteko? Haiek baino entxufatuago ateratzea, haiek adina edo gehiago jokatzea eta korrika egitea, eta bi areatan ondo aritzea”.
Jokalariak berreskuratzen
Igandeko partidarako Zulaikak bi baja baino ez ditu: Ivan Pérez zigortuta dago eta Carlos Bravo lesionatuta. “Garrantzitsua da prentsaurreko batera etortzea eta esatea bi baja bakarrik ditugula, jokalari bat lesioagatik eta beste bat zigorragatik, garrantzitsua da entrenamenduen dinamikagatik, bakoitzak bere postuan joka dezan astegunetan, lehia senti dezaten… Horrek guztiak laguntzen du, baina ez da erabakigarriena. Gogorarazten dizuet CD Badajozen aurka, ia jokalari guztiekin, galdu egin genuela. Eta RC Deportivoren aurka, sei bajarekin, irabazi egin genuen”.
Lehen multzoko 13. jardunaldiko partida igandean jokatuko da, Las Gaunasen, 17:00etatik aurrera.
