Albert Carbó, Real Union Clubeko entrenatzaileak, prentsaurrekoa eman du gaur goizean Barakaldo C.F.-ren aurkako partidaren atarian. Partida larunbatean jokatuko da, 20:00etan.
Kataluniako entrenatzailea Barakaldo C.F. taldeari buruz hitz egiten hasi da: “Oso aurkari zaila da. Dinamika positiboan dagoen taldea da, play-off eremuan, partida bat gutxiagorekin. Irabaziko balute, bigarren izango lirateke. Bost partidatik datoz porrota ezagutu gabe, momentu onean eta bere estadioan jokatuz. Guk ilusiorik eta exijentziarik handienarekin ekingo diogu partidari. Lerro onean gatoz, taldeak konfiantza du eta zerbait positiboa ateratzen saiatzera joango gara”.
Bestalde, Albert Carbok Joan Puig, Real Union Clubak egin berri duen fitxaketa, aztertu du: “Joan Puig RCD Espanyolen futbol profesionala ukitzear zegoen eta lesio batek bere ibilbidea eten zuen. Bere potentzialagatik haratago, oso ona dena, bere pentsamoldeagatik eta gorenera iristeko duen gogoagatik ere gustatzen zaigu. Ilusio handiarekin iritsi da eta asko lagundu behar digu, ez bakarrik denboraldi honetan, baita hurrengoan ere”.
Azkenik, zale txuribeltzei buruz hitz egin du. Entrenatzaileak gure zaleen garrantziaz eta taldeak zaleei helarazi nahi dienaz hitz egin du: “Gure zaletuak oso garrantzitsuak dira guretzat. Zaletuekin sentitzen duguna zelaitik harmailetara eramaten saiatzen garen zerbait da. Sestaoren egunean lotura hori berretsi genuen eta larunbatean etxean are gehiago sentitu genuen. Oso pozik gaude garaipenak ez ezik, zelaitik eurengana daukagun gose hau helarazteaz. Zaleak asko sentitzen ari gara. Espero dut bi busak bakarrik ez izatea eta jende gehiago Barakaldora joatea, haien babesa oso garrantzitsua baita guretzat”.