Náxara Club Deportivo izango da Real Uniónen aurkaria Federazio Kopako final-hamaseirenetako kanporaketan. Kanporaketa irailaren 28an jokatuko da partida bakarrera Stadium Galen, irundarren izena duen bola izan baita zozketan ateratzen lehena.
Federazio Kopako Fase Nazionalaren zozketa eguerdian egin da Las Rozaseko Futbolaren Hirian, eta lau sailkapen-koadro ezarri dira, koadro bakoitza zortzi klubez osatuta, hurbiltasun geografikoaren irizpideen arabera. Norgehiagoka horiek final-hamaseirenei (irailaren 28an jokatzekoak), final-zortzirenei (urriaren 5ean jokatzekoak) eta final-laurdenei (urriaren 12an jokatzekoak) dagozkie. Behin kanporaketa horiek guztiak partida bakarrera jokatuta, finalerdiak A koadroko garailea B koadroko irabazlearen aurka eta C koadroko irabazlea D koadroko irabazlearen aurka neurtuko dira. Finalaurrekoetara iristen diren lau taldeek Errege Kopa jokatzeko txartela lortuko dute. Finalerdietako partidak urriaren 19an jokatuko dira eta finala azaroaren 2an.
