Aitor Zulaika Real Unióneko entrenatzaileak agerraldia egin du Stadium Galeko prentsa aretoan, lehen taldeak larunbat honetan Bilbao Athletic taldearen aurka Stadium Galen jokatuko duen partidaren atarian.
“Bihar partida erakargarria eta polita dugu. Bilbao Athletic Galera etortzen den guztietan horrelako partidak izaten dira. Eta aldi berean zaila. Ez da ahaztu behar Bilbao Athleticek bigarren itzuli honetan buelta eman diola bere emaitza dinamika txarrari. Patxi Salinasek teklarekin eman duela uste dut, taldea trinkoago eta serioago dago eta badaki zertan ari den”, esan du Zulaikak.
“Oso dinamika onean datoz. Azken sei partidetatik lau irabazi dituzte, bat berdindu eta beste bat galdu. Gauzak oso zail jarriko dizkigu, baina ondo dagoen talde bat ere izango du aurkari, bizirik jarraitu nahi duela erakutsi duena. Horretarako partida ona egin beharko dugu. Gu geu izaten saiatu”, adierazi du teknikari azpeitiarrak.
Zuaikak, amaitu aurretik, “zaletuei Galera joateko deia” egin nahi izan die. “Badakit Aste Santuaren erdian gaudela, baina ordu onean jokatzen da eta polita izango litzateke ikuskizun oso bat izatea, ez bakarrik zelaian, baita harmailetan ere. Eta zaletuek eta taldeak bat egin dezatela Bilbao Athletici irabazten saiatzeko”.
RFEF Footters Lehen Mailako I. Multzoko 32. jardunaldiko partida larunbatean jokatuko da, Stadium Galen, 19:00etatik aurrera.
