“Partida oso ona egin beharko da, baloiarekin eta baloirik gabe”

Aitor Zulaika Real Unióneko entrenatzaileak agerraldia egin du gaur goizean Stadium Galeko prentsa aretoan, lehen taldeak igande honetan, 12:00etatik aurrera, SD Amorebietaren aurka etxean jokatuko duen partidaren atarian.

Azpeitikoak aitortu duenez, “astea ondo doa, asteazkenean irabazi egin genuelako. Lehen zatia ona izan zela uste dut. Bigarrena ez hainbeste, egia da Illuecak baloiaren atzean nahi baino gehiago korrika eginarazi zigula, baina Federazio Kopako garaipena da, eta markatuta dugun helburura hurbiltzen gaitu. Jendea ere berreskuratzen ari gara, pixkanaka bada ere”.

Jokalarien sasoiari buruz galdetu diotenean, Zulaikak esan du “jokalari batzuek minutu gehiago dituzte partidetan entrenamenduetan baino. Beobide, Gagua edo Julián bezalako jendea, adibidez. Ez da egokiena base bat hartzeko, baina kontrolatuko dugu. Albiste ona da jokalariak berreskuratzen ari garela. Juliánen kasuan, apiriletik ez du entrenamendu luzerik egin. Oinarri handia behar du, eta poliki-poliki joan behar dugu berarekin. Kontuz ibiliko gara. Denbora behar du”.

“Partida oso ona egin beharko da, baloiarekin eta baloirik gabe. Amorebietak Bigarren Mailara igo zen taldearen funtsa duela uste dut, joko zuzenarekin, ezerezetik aukerak ateratzen dizkizuna, baina egia da aldatu egin direla eta barietate handiagoa dutela. Moldatu egin beharko gara”, berretsi du Real Unióneko entrenatzaileak, aurkariari buruz galdetu diotenean. “Harritzen nau Bigarren Mailan zegoen eta plantilla lehiakorra egin duen talde bat behean egoteak, baina egia da maila den bezalakoa dela. Euskal talde gehienek ere behean egotea zerbait esan nahiko du. Maila handia dago”.

Partida, Lehen Federazioko 2. Multzoko 7. jardunaldiari dagokiona, igandean jokatuko da, 12:00etatik aurrera, Stadium Galen.