Harrobiari buruzko informazioa, online dendan produktuak erosteko aukera, klubaren sare sozialen integrazioa edo kudeaketak zuzenean egiteko aukera izango dira webgune berriaren aukera berrietako batzuk.
Real Uniónek SEO&RED enpresaren zerbitzuak kontratatu ditu klubaren webgune berria diseinatzeko. Euskarazko eta gaztelaniazko bertsioa izango ditu, eta egungo webgunea ordezkatuko du datozen hilabeteotan.
“Webgunea oinarrizko tresna da klubaren berritasunen berri emateko orduan, ez bakarrik gure zaleei, baita urtean zehar klubaren inguruko interesa pizten zaien milaka bisitariei ere. Izan ere, klub historikoa izanda, munduaren luze-zabalean pizten du interesa Real Uniónek. Hortaz, lehentasunezkoa da bultzada bat ematea, planteamendu berri batekin”, adierazi du Igor Emery Real Unióneko administrazio-kontseiluko presidenteak.
Javi Sobrado irundarrak SEO&RED enpresaren izenean adierazi duenez, “webgunea goitik behera birdiseinatuko dugu. Bisualki erakargarria eta dinamikoa izatea nahi dugu, eta aukera emango diogu Real Uniónen zaleari sarean mota guztietako kudeaketak egiteko”.
Badaude atal finko batzuk (klubaren historiari buruzkoa, lehen taldeari buruzko informazioa edo eguneroko albisteak), baina, horiez gain, beste batzuk ere sustatu nahi dira:
- Harrobia. Harrobia klubaren lehentasunetako bat izatea da ideia eta, horrela, espazio bat gaituko da harrobiko talde bakoitzerako.
- Online denda. Webgune berriak aukera emango du klubaren produktuak erosteko, ordaintzeko pasabide seguru baten bidez.
- Gardentasunaren ataria. Espazio berezi batean klubaren datu ekonomiko nagusiak jasoko dira, bai eta intereseko informazioa ere.
- Sare sozialak. Klubaren kontu ofizialak integratuko dira diseinu berrian, eta kokaleku nabarmen batean jarriko dira.
- Zuzeneko kudeaketak. Webgune berrian inprimakiak egongo dira klubaren kudeaketa guztietarako eta, beharrezkoa denean, ordaintzeko metodo seguruak ezarriko dira: abonatuen altak, txartela berritzea, udako campusak, teknifikazio-jardunaldiak…
SEO&REDi buruz
SEO & RED duela zortzi urte pasatxo sortu zuen Alfonso Saboridok, munduan barrena ibili ondoren Málagan ezarri eta gero.
Javik eta Alfontsok osatutako bikoteak Espainia osoan egiten du lan, askotariko enpresentzat marketin digitaleko eta web-diseinuko proiektuak gauzatuz. SEO/SEM posizionamenduan espezializatu ziren aurrena, eta gero brandingean eta marketin digitalean profesionalizatu ziren. Horri diseinu erakargarri eta funtzionalak gehituta itxi zuten SEO&REDen zirkulua.
