Mikel Llorente Real Unióneko entrenatzaileak RC Celta Fortunaren aurka Stadium Galen lortutako garaipenaren balorazioa egin du prentsa aretoan. “Emaitza positiboarekin pozik egon behar dugu. Baita izan den moduagatik ere, 1-2koari eta 0-1ekoari buelta emateko gai izan garelako. Baina autokritika pixka bat ere egin behar dugu. Irabazten duzunean ez dago beti dena ondo eta dena gaizki galtzen duzunean. 1-2aren aurretik aldaketak egin ditugu eta desdoitu egin gara eta minutura haien gola etorri da. Taldeak buelta emateko gaitasuna izan du, taldeak egiten duen horretan sinesten duelako eta izaera handia duelako”.
Real Unióneko entrenatzaileak aitortu duenez, “emaitzei buelta emateko gai gara. Aurreko egunean Bartzelonan ere ikusi genuen eta gaur ere, zaletuen laguntzarekin, taldeak bultza egin du eta lortu du. Jakinda arriskuak ditugula eta sufritu ere egiten dugula, lerro artean tarteak uzten ditugulako, baina honetan sinesten dugu”.
Hondarribiako entrenatzaileak aulkiaren ekarpena ere azpimarratu nahi izan du. “Bost aldaketa egiten ditugu eta taldeak hobera egiten du. Joan den astean aldaketak egin genituen eta taldeak hobera egin zuen. Eta gaur parte hartu gabe geratu den eta ekarpen handia egingo digun jendea ere nabarmendu nahi dut. Lortuko dugun guztia denon artean izango da. Taldea intentsitate horietan maneiatzen bada, astelehenetik ostiralera intentsitate horietan entrenatzen delako da. Eta hori guztiaren lana da”.
