Aitor Zulaika Real Unióneko entrenatzaileak agerraldia egin du gaur goizean Stadium Galeko prentsa aretoan, taldeak larunbat honetan Real Sociedad Bren aurka jokatuko duen partidaren atarian.
Taldeak partidari aurre egiteko denbora gutxi behar izan duela eta Galizian jokatu ondoren zenbait jokalarik minutu pilaketa izan dutela eta, Zulaikak honakoa erantzun du: “Sansek iragan larunbatetik darama partida hau buruan. Egia da. Eta guk larunbatetik Murtzian eta Galizian jokatu dugu. Ia 4.000 kilometro egin ditugu autobusean, badakizue plantillaren egoera. Eta zer egingo dugu? Profesionalak gara. Partida prestatzeko egun pare bat gehiago izatea gustatuko litzaigukeela. Bai, baina final bat jokatu eta Errege Kopan sartu nahi genuen. Dena ezin da”.
Kazetariek aurkariaren taldeaz galdetu diote Azpeitikoari. “Talde ona da. Sansek, erregistro eta marrazki ezberdinekin, azken urteetako patroi bera du. Baloia ahalik eta gehien kentzea eta defentsako ideiak argi izatea izango dira gakoak”, erantzun du Zulaikak. Sergio Franciscori buruz honakoa esan du: “Teknikari bikaina da, talde tekniko bikainarekin. Talde bat daukagu, eta elkartu eta afaldu ere egiten dugu. Pike hori egongo da, derbietan beti daude horrelako osagaiak”.
“Hamaika bajarekin joan ginen Galiziara eta bi baja gehiago ditugu txartelengatik. Baina gaur egun ezin dut ezer esan. Jendea berreskuratzea espero dut”, gaineratu du Real Unióneko entrenatzaileak.
Lehen Federazioko 2. Multzoko 9. jardunaldiko partida larunbat honetan jokatuko da, 19:00etatik aurrera, Stadium Galen.
