Aitor Zulaika Real Unióneko entrenatzaileak agerraldia egin du Stadium Galeko prentsa aretoan, lehen taldeak igande honetan Unionistas de Salamanca taldearen aurka Reina Sofía futbol zelaian jokatuko duen partidaren atarian. Azpeitiarrak zera adierazi du: “Taldea ondo dago. Eta ez naiz soilik atera ditugun azken 6 puntuetatik 4 horietaz ari. Taldea bizirik dago, uste du zerbait polita lor dezakegula aurten. Badakigu horretarako astea ondo prestatu behar dela eta asteburuan hobeto lehiatu”.
Unionistas de Salamanca taldeaz galdetuta, Zulaikak esan du “aurkari zuzena” dela. “Partida horiek 4 puntukoak direla esan ohi da. Baina denboraldi hasieran esan ohi dut beti, eta gaur ere esango dut. Eta igandea galdu eta gainerako laurak irabazten badituzu, zer? Eta alderantziz bada? Aukera asko daude zabalik, matematikatik hainbeste tira egin behar da… uste dut aste bakoitzetik haratago joateak ez duela ezertarako balio”. Real Unióneko entrenatzaileak “taldea bizirik dagoela eta bere buruarengan sinesten duela pentsatzeko argudio guztiak” dituela ziurtatu du. “Eta bizirik jarraituko dugu. Salamancan zer gerta ere”.
Belar artifiziala
Real Unióneko entrenatzaileari Reina Sofía estadioko belar artifizialaz galdetu diote. “Aldaera bat gehiago. Denboraldia hasi aurretik bagenekien, belar artifizialeko zelaietan jokatu dugu. Belar artifizialean entrenatu ohi gara. Ez dago aitzakiarik. Hona etorri ziren lehen itzulian belar naturalean jolastera eta ondo lehiatu ziren. Nik ere han ondo egitea espero eta nahi dut”, adierazi du Zulaikak, eta gaur komunikabideen aurrean egin duen agerraldia baliatu nahi izan du aurkariaren zaletuei balioa emateko. “Futbol profesionalean bizi izaten ari garen aste polemiko honetan, aprobetxatzea gustatuko litzaidake futbol herrikoia berriz aldarrikatzeko, Unionistas de Salamanca bezalako zaletuekin, ugaria, zaratatsua… gozamena izango da han jokatzea. Sei jardunaldiren faltan, gauza polit bategatik ari gara borrokan, zaletu asko mugitzen dituen aurkari zuzen baten aurka… pizgarri asko dira Salamancara joateko. Zer gehiago nahi dugu? Hiru puntu”.
RFEF Footters Lehen Mailako I. Multzoko 33. jardunaldiko partida igandean jokatuko da, Reina Sofía futbol zelaian, 12:00etatik aurrera.
